فكروني ..

لما بكون مدايقة بحاول أفتكر.. هو أنا لما بكون مش مدايقة بكون حاسة بإيه؟؟ ..
وبقول لنفسي لازم بعد كدة لما أكون مش مدايقة أفرح واستمتع بإني مبسوطة ..
بس للأسف .. مش علطول بفتكر..
فلو سمحتم..

فكروني لما أكون مبسوطة إني مبسوطة .. عشان أنبسط إني مبسوطة..

لما بكون في مواقف معينة لازم آخد فيها قرار وبكون محتارة أوي .. بفكر كتير وبستخير.. وفي الآخر وبعد طول تفكير بوصل لاستنتاجات معينة بتخليني الحمد لله أعرف آخد القرار .. وبفكر إني إن شاء الله لما أكون في موقف مشابه مش هرجع أفكر من الأول وأتعب قلبي لأن في الآخر برده بوصل لنفس الاستنتاجات
وبقول لنفسي .. لازم بعد كدة أبدأ تفكير على أساس الاستنتاجات إللي وصلتلها قبل كدة بدل ما أبدأ من الأول تاني ..
بس للأسف .. مش علطول بفتكر..
فلو سمحتم..

فكروني لما أكون في مواقف مشابهة للمواقف المشابهة .. آخد قرارات مشابهة للقرارات إللي خدتها في المواقف المشابهة..

لما بكون مدايقة من نفسي لأي سبب .. بقرر إني خلاااااااص من بكرة هبدأ صفحة جديدة .. وهكون ياسمين مختلفة تماما ..
وبقول لنفسي .. إن كل حاجة مش صح كنت بعملها مش هتتعمل تاني .. وكل حاجة حلوة مفروض أعملها هبتدي أعملها من بكرة.. وبنام وبصحى وبكرة بييجي ..
بس للأسف .. مش علطول بفتكر..
فلو سمحتم..

فكروني لما أبدأ صفحة جديدة إني بدأت صفحة جديدة .. عشان أفتكر أبدأ صفحة جديدة ..

لما بكون مش فاضية .. بفتكر كل الحاجات إللي عايزة أعملها لما أكون فاضية ..و كل الناس إللي وحشنَي وعايزة أشوفهم أو أكلمهم .. وكل الأماكن إللي عايزة أروحها .. وكل الحاجات إللي عايزة أفكر فيها .. وحاجات تانية كتير ..
وبقول لنفسي .. أول ما أكون فاضية .. هعمل كل الحاجات إللي نفسي أعملها ..
بس للأسف .. مش علطول بفتكر..
فلو سمحتم..

فكروني لما أكون فاضية إني فاضية .. عشان أعمل كل الحاجات إللي عايزة أعملها وأنا فاضية .. ومبقاش فاضية..

كتير بنسى .. ولما بنسى بكون مش عارفة إني ناسية عشان بكون مش فاكرة أصلا إن في حاجة عايزة أفتكرها عشان أنساها ..
فلو سمحتم..

فكروني لما أكون مش فاكرة، وفاكرة إني فاكرة .. إني مش فاكرة .. عشان أفتكر

وشكرااااااا