يوم الأحد
توقظها أمها بصعوبة .. فنومها ثقيل جدا .. و خاصة في بداية الأسبوع، حيث تسهر في أجازة نهاية كل أسبوع لتقضي أكبر و قت ممكن مع والدها الذي تضطره ظروف عمله للسفر أسبوعيا..
تفعل كل شيء من طقوس الصباح و هي تقريبا نائمة .. من أول غسل وجهها الى ارتداء ملابسها..
أحيانا تنام أثناء تناولها الإفطار .. فتوقطها أمها لتمضغ الطعام .. ثم تنام .. فتوقظها لتبلعه ..
أثناء نزولها في المصعد تسألها أمها : فين شنطتك يا ياسمين؟
فتجيب في براءة: نسيتها في البيت ..
فيصعدون مرة أخرى لإحضارها..
في الطريق تسير ممسكة بيد أمها من ناحية و أختها من ناحية، و أخوها يسير بجانبهم لأنه أكبرهم ..
تتشبث بيد أمها أكثر ليقوموا بالمغامرة اليومية لعبور الطريق، و تنظر يمينا و يسارا كما علمتها أمها"مع أن الطريق إتجاه واحد" ..
كانت ترى أن السيارات المسرعة و البوتجاز هما من أعظم الأخطار التي تهدد البشرية، و لو أطاع الأطفال ذويهم و ابتعدوا عن البوتجاز، و أمسكو بأيديهم أثناء عبور الشارع .. لعاشت البشرية في سلام ..
يسيرون جنبا الى جنب في طريقهم .. أولا يصلون الى الحضانة القريبة حيث تذهب سارة .. ثم يصلون الى مدرسة أحمد ..
ثم تسير وحيدة مع أمها الى أن يصلا الى مدرستها ..
فتسأل أمها السؤال اليومي: هو بابا جي إمتى؟
فتجيب أمها: يوم الخميس إن شاء الله
فتقول و هي تعد على أصابعها: يعني ننام و نصحى و ننام و نصحى و ننام و نصحى و ننام و نصحى و بابا ييجي؟
فتجيب أمها و هي تبتسم: أيوة يا حبيبتي..
****
يوم الأثنين
-هو بابا جي إمتى؟
-يوم الخميس إن شاء الله
-يعني ننام و نصحى و ننام و نصحى و ننام و نصحى و بابا ييجي؟
- أيوة يا حبيبتي..
****
يوم الثلاثاء
-هو بابا جي إمتى؟
-يوم الخميس إن شاء الله
-يعني ننام و نصحى و ننام و نصحى و بابا ييجي؟
- أيوة يا حبيبتي..
****
يوم الأربعاء
-هو بابا جي إمتى؟
-يوم الخميس إن شاء الله
-يعني ننام و نصحى و بابا ييجي؟
- أيوة يا حبيبتي..
هناك 11 تعليقًا:
تعلمي يا عزيزتى أكثر مالفت نظري في هذه القصة القصيرة، هو تعلق الأنسان بالأمل دائما للحث على الإستمرار في الحياة. كلنا ياسمين الصغيرة وكلنا نسأل كل يوم عن أشياء ننتظرها ومتى تأتي لنملي أنفسنا بأنها ستأتي غدا فنستمر في اليوم وننتظر الغد.واهم ما نسأل عنه متى الراحة؟يمكن بكرة لما أخلص الحاجة اللي واريا دي ارتاح بقي.ويأتى غدا وتنتهى الحاجة لتظهر معها مهمة جديدة:)
أدائك رائع وأحساسك عالى ماشاء الله
ربنا يستخدمك ولا يستبدلك أبدا
هو بابا جي إمتى؟
-يوم الخميس إن شاء الله
-يعني ننام و نصحى و بابا ييجي؟
- أيوة يا حبيبتي..
جميل قوى روح الأطفال دى والأجمل الأمل
تحياتى
دمتى بود
مشاعر الابنه تجاه والدها مشاعر جميله وفيها حب كبير قوى
وبعدين ابقى نامى بدرى شويه
وكمان اصبرى على سفر بابا
بسافر علشانك انتى واخواتك
نورا .. جزاك الله خيرا على التعليق، حسستيني ان القصة عميقة أوي، و هي مجرد ذكريات طفولية.. تعليقك جميل أوييي .. أنا حابة في القصة دي فكرة ان الأطفال بيشوفوا الدنيا و الحقائق بسيطة أوي على قد تفكيرهم.. يعني انها شايفة ان أيام الأسبوع هي عبارة عن مجموعة من ال (ننام و نصحى) .. جزاك الله خيرا على التعليق و الدعاء
محمد و رومانسي .. جزاكم الله خيرا على تعليقكما..
أهم حاجة في البوست هو العنوان
كل اللي يهم البنوتة الصغيرة هو إنه بكل بساطة هننام و نصحى كام يوم... و نلاقي اللي كنا مستنيينه :). حياتهم بسيطة و بريئة أوي دايما
بنت أختي فعلا دايما تقول هنام و بعدين أروح المكان الفلاني :).
عجبني روح البوست اللذيذ دة:)
تحياتي
يا رب كل يوم أنام و أصحى ألاقيكى كاتبه حاجات جميله زى دى
و اللى عاجبنى كمان أن اليوم عندها ننام و نصحى و مش هاممها اللى فى النص
ده الواحد بيبقى فى نص اليوم و شايل هم الساعه الجايه و بيقول يا مين يجيب ميعاد النوم (:
===
بتنامى و انتى بتمضغى الأكل يا شيخه ؟(:
أنا أبقى نايمه الصبح اه بس ساعه ما أشوف أكل عينيا تفنجل خصوصا لو بحبه (:
و حلوه الشنطه اللى بتنسيها و تقوليلهم ببراءه أنا نسيتها دى بس هم على الأقل لسه فى الأسانسير ... أنا كنت أخلى بابا يودينى المدرسه و بعدين أعمل الحركه دى يرجع بيا يجيبهالى تانى ههههههههههه
أيااااااااااام والله ... معلش أنا رغيت كتير
ربنا يخليلك أهلك و ما تفترقيش عنهم ابدا (:
wish i were a butterfly
عندك حق الأطفال بيشوفوا كل حاجة ببساطة و براءة جميلة زي بنت اختك كدة، شكرا جدا على تعليقك،نورتيني :-)
دودو ..
أيوة كدة، كنت مستنية تعليقك لأنه فعلا بيفرق معايا .. ربنا يكرمك يا دودو على كلامك الجميل ..
بصراحة أنا لو مكان باباك مكنتش هرجع أجيبلك الشنطة، كنت هرجعك البيت و بلاها علام خالص :-)
أقولك سر كمان، أنا مش كنت بس بنام و انا باكل، ده أنا كمان كنت بنام في المدرسة ف وسط الحصص، بس خلاص دلوقتي بقيت انسانة طبيعية الحمد لله ..
bsra7 el tdwyna 3gabtny bs 2stnt
t2olyly eh ely 7asl yom el5amys?!!!hahahaa
مجرد اننا ننام ونصحى .... بس !!!
فكرتيني بنفسي وأنا طفلة !
يااااه ... الأطفال بريئين جدا ...
لو نرجع أطفال تاني ننام ونصحى وبس واللي عايزينه يتحقق !
تدوينتك دي حساسة جدااا ؛
ومدونتك رقيقة جدااا جدااااا
سعدت جدا بزيارتها ....
نهى .. فكريني أحكيلك ايه اللي حصل يوم الخميس لو عايزة.. شكرا يا ستي على التعليق
اصرار أمل .. شكرا جدا و جزاك الله خيرا على كلامك الجميل، و أنا و الله سعدت جدا بزيارتك و ان شاء الله تتكرر علطول
يييا تصدقى ان علا اختى كانت بتعمل كدة :)
إرسال تعليق